كلنا منعرف , أن دوارة السوق غالية على قلب النسوان

وجارتنا أم مروان , نزلت عالسوق واشترت أغلى فستان

رجعت عالبيت ولبست الفستان وصارت تتمختر قدام جوزها المعتر الغلبان

ولما شاف سعره صار يصرخ  بصوت عالي وسمع كل الجيران

قالها معقول يامرتي شارية بكل مصروف البيت .. فستان ؟

شو بدك ياني اشحد , ولا بدك عقلي يصيبه جنان

روحي فوراً رجعيه , أو رح جيب مقص وأعمل من قماشه خيطان

قالتله : له يارجال طول بالك مابدك تتغدا .. أكيد أكيد أنت جوعان

عملتلك أكله بتحبها كتير وبدك  تاكل أصابعك وراها كمان

سلقتلك هالجاجة وقطعتها وحمرتها وحطيتها مع الرز فوق البيتنجان

قالها دخيلك الحقيني  بسرعة  بالأكل  وخلينا ناكل حاكم تعبان كتير ونعسان

بلكي مقلوبة هالبيتنجان بتقلبلي عيشتي  وبتخليني انسى إني طفران

 

مقلوبة الباذنجان مع الدجاج

المقادير   :
دجاجة أو دجاجتين حسب حجم العائلة
كيلو و نصف رز
3 حبات باذنجان كبيرة

بصلة كبيرة عدد2  
بهارات
ملح و فلفل

 

الطريقة  : 
- ينقع الرز لمدة نصف ساعة و بعدها يغسل و نضيف اليه البهارات و الفلفل و الملح حسب الحاجة 

تقطع البصلة بعد التقشير بشكل طولي وتقلى حتى تصبح زهرية اللون وتوضع أسفل الطنجرة
- يقشر الباذنجان ثم يقطع قطع كبيرة و يقلى حتى يحمر لونه  ونضعه فوق البصل
- يقلى الدجاج حتى يحمر و يستوي ثم يوضع فوق الباذنجان ثم نضيف اليه الرز المبهر   .
- نضع فوقه الماء الساخن بمقدار أعلى من الرز بثلاث سم و يطبخ على نار متوسطة ثم يهدأ تحته لمدة نصف ساعة حتى يتشرب الرز كل الماء و ينضج   .
- يترك لمدة 10 دقائق و بعدها نقلب الطنجرة  في وعاء ونسكب المقلوبة ويمكن قلي الصنوبر وتزيين الطبق . تقدم أمام المقلوبة السلطات واللبن 

                                                         وصحتين وعافية   .